Azərbaycan tikinti sektorunda özünəxas üslubu ilə fərqlənən və unikal konstruktiv quruluşa malik hündürmərtəbəli binaların müəllifi olan “SMTS” MMC daha bir böyük uğura imza ataraq, Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin Yeni İnzibati Binasını inşasını müvəffəqiyyətlə tamamlayıb təhvil verdi. 27 mart 2023-cü il tarixində inzibati binanın rəsmi açılış mərasimi baş tutdu və Prezident İlham Əliyev binanın rəsmi açılış mərasimində iştirak edərək görülən işlərlə yaxından tanış oldu.
Bakı şəhərində son illərdə tikilmiş hündürmərtəbəli binalar ansamblında unikallığı ilə seçilən yeni inzibati bina modern və postmodern memarlıq üslubunda layihələndirilmiş və mürəkkəb konstruktiv quruluşa malikdir.
Yeni İnzibati binanın layihələndirilməsi dünya şöhrətli və ölkəmizdə də bir çox məşhur layihələrin müəllifi olan Avstryanın “Hoffmann-Janz” GmbH memarlıq şirkəti tərəfindən həyata keçirilmişdir. Layihənin yerli norma və standartlara uyğunlaşdırması işləri “Arxin-M LTD” MMC şirkətinə həvalə olunmuşdur.
Binanın inşasına texniki nəzarət (tikinti menecement) xidmətləri Almaniyanın “Obermeyer Project Management GmbH” şirkəti və dəmir beton, fasad, metal konstruksiya, daxili bəzək-tamamlama, elektrik və mexanika bölmələri üzrə son tamamlama işlərinə isə “Technicon Engineers Consulting” MMC həyata keçirmişdir.
Bina 33 mərtəbədən ibarət olub 125 m hündürlüyə malikdir. Binanın təməli diametri 1 m, uzunluğu 40 m olan 140 ədəd dəmir-beton svayların üzərindədir.
Bakı şəhəri seysmik cəhətdən aktiv zonada yerləşdiyi üçün, binanın yükdaşıyan konstruksiyaları 9 ballıq zəlzələyə tab gətirəcək şəkildə inşa edilmişdir.
Binanın hər mərtəbəsi digər mərtəbəyə nəzərən 2.65º dönür və nəticədə, fasad müstəvisi 90º dönərək binaya burulma effekti verir. Dunyada bu tip dönən binalar çoxdur, lakin inzibati binanın fasadının tam olaraq şüşədən ibarət olması və hər bir şüşə panelinin özünün də əyilmiş olması onu digər binalardan fərqləndirir.
Binanın unikal edən digər bir konstruktiv cəhəti isə, yuxarıdan baxdıqda ümumi sahəsi 2837 m² olan kürsü mərtəbəsinin Azərbaycan Respuklikasının xəritəsi formasında inşa edilməsidir və şərq tərəfdən “Xəzər Dənizi” dekorativ hovuzu ilə əhatə olunmasıdur. Dekorativ hovuz 1200 m² sahəni əhatə edir, dərinliyi 18-28 cm aralığındadır.
İnzibati binanın işçi mərtəbələri 254 otaqdan ibarətdir, inzibati binada 537 əməkdaşın rahat və səmərəli fəaliyyəti üçün hər cür şərait yaradılıb. Burada müasir multimedia vasitələri ilə təchiz olunmuş və ayrıca tərcümə otağı olan müxtəlif tədbirlərin keçirilməsi üçün Kürsü mərtəbəsində 150 nəfər iştirakçı tutumuna malik 410 m² sahəsi olan “Bakı zalı” və 19-cu mərtəbədə 25 nəfər iştirakçı üçün nəzərdə tutulan 124 m² sahəsi olan konfrans zalları mövcuddur, həmçinin müxtəlif təyinatlı iş, iclas otaqları yaradılıb. Yeni inzibati binanın 26-cı mərtəbəsində 163 işçinin eyni vaxtda rahat qidalanması üçün restoran və 30-cu mərtəbədə tədbir iştirakçıları üçün ziyafətlərin təşkili və qonaqların rahat istirahəti üçün 93 nəfərlik tutuma malik “VİP Lounge” mövcuddur.
Binanın zirzəmi qatında böhran vəziyyətində idarəetmə məntəqəsi, müasir avadanlıqlarla təchiz olunmuş ümumi sahəsi 490 m² olan 105 nəfərlik “Mülki Müdafiə” otağı mövcuddur.
Binanın texniki mərtəbəsində 6 ədəd AHU havalandırma sistemi quraşdırılıb. Texniki binada isə 1 ədəd gücü 1250 kVA olan, avtomatik işə salınan dizel generatoru, 3 ədəd gücü 1100 kW olan İtaliya istehsalı olan qazan və soyutma gücü 1580 kW olan 4 ədəd YORK markalı çiller quraşdırılmışdır.
Yeni inzibati binanın fasiləsiz və dayanıqlı elektrik enerjisi ilə təmin edilməsi məqsədilə hər birinin gücü 2500 kVA, gərginliyi 35/0.4 kV olan, Schneider markalı 3 ədəd transformator da quraşdırılmışdır.
Zizəmi mərtəbəsində bina və qurğularda baş verə biləcək yanğınların operativ söndürülməsi üçün obyektin mərtəbəliliyi, odadavamlılıq dərəcəsi, işçilərin sıxlığı nəzərə alınmaqla ən yüksək norma və standartlara cavab verən tutumu 152 m³ olan 2 ədəd yanğın su hovuzu və tutumu 90 m³ və 104 m³ olan 2 ədəd içməli su çəni inşa edilmişdir.
1-ci zirzəmi mərtəbəsində 153 nəqliyyat vasitəsi üçün ümumi sahəsi 7906 m² olan dayanacaq inşa edilmişdir.
Müasir dövrdə elmi-tərəqqinin əldə etdiyi nəaliyyətlərdən istifadə edilərək binadaxili mikroiqlimin təmin olunması, binadaxili su borularının və elektrik xətlərinin monitorinqi, səmərəli enerji/resurs sərfiyyatının tənzimlənməsi, işıqlandırma sisteminin idarə olunması, təhlükəsizlik sistemlərinin (videomüşahidə, məlumatlandırma və girişə nəzarət) idarə olunması, yanğın siqnalizasiyalarının və yanğınsöndürmə sisteminin izlənməsi, lokal və ümumi idarə olunması və fövqəladə hal vaxtı müəyyən olunmuş ssenari üzrə bütün mühəndis-texniki sistemlərinin tənzimlənməsi üçün avtomatik idarəetmə sistemdən (BMS) quraşdırılmışdır.
İnzibati binanın ətrafında 1320 m² ərazi yaşıllaşdırılmış, 14 tipdə 216 ədəd ağac və gül, 3500 ədəd dekorativ gül-çiçəklər əkilmişdir. Mövcud ağaclara toxunulmamışdır. Həmçinin yaşıllaşdırılmış ərazidə mərkəzi sulama sistemi nəzərə alınmışdır.
Fasadın təmizlənməsinin təşkilini asanlaşdırmaq və sürətləndirmək məqsədilə, dam hissəsində Atech şirkətinə məxsus BMU fasad yuma qurğusu quraşdırılmışdır.
Baş podratçı olaraq “SMTS” Məhdud Məsuliyyətli Cəmiyyəti inzibati binanın tikintisini yerli şirkətlərlə yanaşı, Modul Çelik Yapı və Petrol San.Tic.Ltd.Şti., Metal və Yapı Sistemləri Ticarət A.Ş., Kone Elevators Ltd., Atechbcn, S.L., Permisan İnş.Dek San. Ve Tic.Ltd Şti A.Ş., Schneider Elektrik San. Və Tic. A.Ş. və sair kimi xarici şirkətlərlə əməkdaşlıq çərçivəsində yerinə yetirmişdir.
Öz əzəməti ilə paytaxt Bakının göydələnləri arasında ucalan bu binanın uğurla inşa edilməsində əziyyəti olan bütün yerli və əcnəbi şirkətlərə təşəkkürümüzü bildiririk!
